कविता
म यहाँ एउटा
सपना बोकेर आएकी छु
बुकी फुल जस्तै
फुल्ने सपना लिएर
गाउँतिरै छाडेकी छु भीरपाखा, देउराली
अनि साना गोरेटोहरु
सहरमा बुढासुब्बा
बाँस झ्याङ रुङेर बाँचिरहेको छ
रातभर बत्तीमा जागेको सहर
बगरकोटमा डिस्को नाचिरहेको छ
सहरमा भाले कम
र घण्टाघर बढी बास्दोरहेछ
म यही सहरमा
सपना खोज्दै आएकी हुँ
सपना
पब्लिक स्कुलको चौरबाट देखिरहेकी छु
सपना
गुरुहरुको आवाजमा सुनिरहेकी छु
गाउँ फर्केर जुनकीरी बन्ने सपना
यही स्कुलबाट देखिरहेकी छु ।
खोटाङ, हाल : धरान
.......
