धरान, जेठ ३ । अन्तरराष्ट्रिय परदेशी साहित्यिक समुहले धरानमा शनिबार एक कार्यक्रमको आयोजना गरी दुई कृति लोकार्पण गरेको छ । पुस्तकहरुमा भीम विरही राईद्धारा लिखित कविता सङ्ग्रह ‘बारुदले कोरेका अक्षरहरु’ र समुहको वार्षिक प्रकाशन ‘परदेशी विम्बहरु’ रहेकाछन् ।
कृतिहरुको कार्यक्रमका प्रमुख अतिथि प्राडा टङ्क न्यौपाने, प्राडा भीमप्रसाद खतिवडा, सिक्किम सरकारका प्रवक्ता वरिष्ठ साहित्यकार सिपी शर्मा भट्टराई लगायतले लोकार्पण गर्नुभयो । लोकार्पित कृतिहरुमाथि कविद्धय देवान किराती र सुदिप पाख्रिनले पाठकीय समीक्षा प्रस्तुत गर्नुभएको थियो । लोकार्पित कविता सङ्ग्रहमा रहेका कविताहरु मध्ये छानिएका कविताहरु विश्वजीत राई, तीर्थ विश्वकर्मा, आइती ग्यावा तामाङ र वर्षा भण्डारी गरी चारजना कविहरुले वाचन गर्नुभएको थियो ।
कार्यक्रममा कविहरु टीका आत्रेय, जेबी निखुन्त र जमा वाम्बुले राईले आफ्ना रचना वाचन गर्नुभएको थियो ।
समुहका अध्यक्ष तथा साहित्यकार सुरेन्द्र लिम्बु परदेशीले आफ्ना स्वर्गीय बुबाको स्मृतिमा स्थापना गर्नुभएको भीमबहादुर स्मृति साहित्य सम्मानबाट सिक्किम सरकारका प्रवक्ता तथा वरिष्ठ साहित्यकार सिपी शर्मा भट्टराईले सम्मान गरिएको थियो । भीमबहादुर स्मृति साहित्य पुरस्कारबाट हाल अमेरिका निवासी साहित्यकार डा.नारद पोखरेललाई पुरस्कृत गरिएको थियो । पुरस्कार राशी १५ हजार रुपैया र ताम्रापत्र रहेको थियो ।
कार्यक्रममा सम्मानित व्यक्तित्व सिपी शर्मा भट्टराई, विशेष अतिथि प्राडा भीमप्रसाद खतिवडा प्रमुख अतिथि प्राडा टङ्क न्यौपाने लगायतले आफ्नो मन्तव्य राख्नुभएको थियो ।
‘बारुदले कोरेका अक्षरहरु’ कवि भीम विरहीको तेस्रो कृति हो भने अन्तरराष्ट्रिय परदेशी साहित्यिक समुहद्धारा नियमित प्रकाशनरत ‘परदेशी विम्बहरु’ को यो १६ औँ अङ्क हो ।
...........
