धरान, बैशाख ६ । कोशी प्रदेशस्तरीय एसइइ स्पिकर–२०८१ सिजन–५ को दोस्रो अडिसनबाट २३ प्रतिस्पर्धी सेमीफाइनल प्रवेश गरेकाछन् । शनिबार धरानमा सम्पन्न दोस्रो चरणको प्रतिस्पर्धाबाट सेमीफाइनलिष्ट छनौट गरिएको आयोजक ¥याडिकल लाइट नेपाल प्रा.लि.का अध्यक्ष तिर्थ कार्कीले जानकारी दिनुभयो ।
एसइइ दिएर नतिजाको पर्खाइमा रहेका विद्यार्थीहरुलाई अवसर दिने, फुर्सदको समयको सदुपयोग गर्दै उनीहरूको व्यक्तित्व, नेतृत्व क्षमता र वाक्कलाको विकास गर्ने उद्देश्यले विगत ५ वर्षदेखि प्रतियोगीता आयोजना हुँदै आएको छ । हाल जारी प्रतियोगीतामा २०८१ सालको माध्यमिक शिक्षा परीक्षा एसइइ दिएर बसेका विद्यार्थीहरु सहभागी छन् । कुल ३४ जना सहभागीमध्ये २३ जना सेमिफाइनल प्रवेश गरेको अध्यक्ष कार्कीले बताउनुभयो ।
सेमिफाइनलिष्टहरुमा शिक्षादीप एकेडेमी इटहरीकी समीक्षा पौडेल, लोटस इङ्लिस बोर्डिङ स्कुल धरानकी सृष्टिका राई र श्रद्धा शाक्य, पब्लिक हाईस्कुलकी जिज्ञासा भट्टराई, साक्षी मिश्र र आयुषा पौडेल छन् । हिबिस्कस इङ्लिस बोर्डिङ स्कुलकी दिविका राई, एभरेस्ट चिल्ड्रेन होम सेकेन्डरी स्कुल पानबारीका निशान विश्वकर्मा, सरस्वती मा.वि. पानबारीकी निर्मला भण्डारी र आयुषा आचार्य पनि सेमिफाइनलमा प्रवेश गरेका छन् ।
त्यस्तै, होलीबेल इङ्लिस सेकेन्डरी स्कुल, झापाका आविष्कार राउत, बेबिलोन सेकेन्डरी बोर्डिङ इटहरीकी होमिता पोख्रेल, भरौल बाल मन्दिर इङ्लिस स्कुल, बराहक्षेत्रकी सलिना राई, ब्लुम नेपाल स्कुल इटहरीका शुभम पोख्रेल, पर्वत सेकेन्डरी स्कुल धरानका निङ्साङ लिम्बु र पिक्सि राई, डिपोट सेकेन्डरी स्कुल धरानकी रोशनी नेपाल, कार्मेल हाईस्कुल धरानकी पूजा लिम्बु, भानु स्मृति मा.वि.धरानकी प्रतीक्षा तामाङ, सियोन स्कुल धरानकी सोनिया राई, के.के. इन्टरनेसनल स्कुल धरानकी तपस्या भण्डारी, जेम सेकेन्डरी बोर्डिङ धरानकी सन्जिना राई र सुनाखरी एकेडेमी धरानकी नाबिया सरखाना सेमिफाइनलमा छानिएका छन् ।
प्रतियोगिताका निर्णायकहरूमा महेन्द्र बहुमुखी क्याम्पस धरानका उप–प्राध्यापक राजेश विद्रोही र सैनिक आवासीय मा.वि. धरानका अङ्ग्रेजी शिक्षक डिल्लीराम कट्टेल हुनुहुन्थ्यो ।
प्रतियोगीहरुले ‘नेपालको वर्तमान शिक्षा प्रणाली’, ‘देश विकासमा युवा पुस्ताको भूमिका’, ‘नेपाली संस्कृतिको संरक्षणमा हाम्रो कर्तव्य’, ‘डिजिटल प्रविधिको प्रभावः वरदान कि अभिशाप ?’, ‘जलवायु परिवर्तन र हाम्रो दायित्व’, ‘सकारात्मक सोचको शक्ति’, ‘हरेक व्यक्ति इमानदारः समृद्ध राष्ट्रको आधार’ गरी सात शीर्षकमध्ये कुनै एकमा बोल्नुपर्ने थियो ।
प्रतियोगिताका विजेताले रु. ५५ हजार नगद पुरस्कार, धरानमा प्लस टु अध्ययनका लागि शत–प्रतिशत छात्रवृत्ति, ट्रफी र प्रमाणपत्र प्राप्त गर्नेछन् । फस्ट रनर–अपले रु. २५ हजार नगद पुरस्कार र ६० प्रतिशत छात्रवृत्ति, सेकेन्ड रनर–अपले रु. १० हजार नगद पुरस्कार र ५० प्रतिशत छात्रवृत्ति, ट्रफी र प्रमाणपत्र प्राप्त गर्नेछन् ।
.....................
