धरान, जेठ ६ । २०८१ सालको माध्यमिक शिक्षा परीक्षा (एसइइ) दिएर फुर्सदमा रहेका विद्यार्थीहरूलाई सिर्जनशील, अभिव्यक्तिमूलक र व्यक्तित्व विकासतर्फ उन्मुख गराउने उद्देश्यले आयोजना गरिएको ‘एसइइ स्पिकर–२०८१ सिजन–५’ अन्तर्गत पब्लिक चोइस अवार्ड उपशीर्षक प्रतियोगिता शुक्रवार सम्पन्न भएको छ ।
कार्यक्रम ¥याडिकल लाइट नेपाल प्रा.लि. धरानको आयोजना र धरान उप–महानगरपालिका वडा नं. १४ को संयोजनमा धरान–१४, बिजयपुरस्थित बुढासुब्बा मन्दिर परिसरको चौतारीमा सम्पन्न भएको हो ।
प्रतिस्पर्धामा फाइनलमा पुगेका वक्ताहरूलाई ‘नशा होइन, सीप र सिर्जनामा युवा’ र ‘विजयपुर ः ऐतिहासिक र पर्यटनको गन्तव्य’ गरी दुई शीर्षकमध्ये एक छनोट गरी आफ्नो धारणा प्रस्तुत गर्ने अवसर प्रदान गरिएको थियो ।
कार्यक्रमबारे जानकारी दिंदै आयोजक संस्था ¥याडिकल लाइट नेपालका अध्यक्ष तीर्थ कार्कीले भने, ‘सधैं चार भित्ताभित्र सीमित सभाहलमा हुने कार्यक्रमलाई यसपटक खुला आकाशमुनि, हरियाली र मनोरम वातावरणमा आयोजना गरी सहभागीलाई फरक अनुभूति दिन खोजिएको हो । बुढासुब्बा मन्दिर परिसरमा कार्यक्रम गर्नुको पछाडि सौन्दर्य, सन्देश र सरोकारको त्रिवेणी समेट्ने उद्देश्य थियो ।’
कार्यक्रममा सहभागी शुभम पोखरेलले बिजयपुर क्षेत्र धार्मिक, ऐतिहासिक र सांस्कृतिक दृष्टिले समृद्ध रहेको उल्लेख गर्दै स्थानीयवासी, सरकार र सरोकारवालाहरूको समन्वयमा यस क्षेत्रलाई महत्वपूर्ण पर्यटकीय गन्तव्यको रूपमा विकास गर्न सकिने धारणा व्यक्त गरे । त्यस्तै अर्की प्रतिस्पर्धी दिविका राईले युवाहरू लागुऔषधको दलदलमा फस्न नदिन सकारात्मक सोच, व्यावसायिक सीप र सिर्जनात्मक क्रियाकलापमा जोड दिनुपर्ने धारणा राखिन् ।
त्यस्तै अर्की प्रतियोगी सन्जिना राईले युवाहरूले कुलत त्यागेर जीवनमा केही गर्न सक्ने दृष्टिकोण राख्दै भनिन्, ‘नशाले सोच मर्छ, सोच मरे सपना मर्छ । त्यसैले युवाहरूले आधुनिक सीप र सिर्जनामार्फत आत्मनिर्भर बन्ने बाटो रोज्नुपर्छ ।’
कार्यक्रमका प्रमुख अतिथि धरान–१४ का वडा अध्यक्ष कृष्णप्रसाद भट्टराईले एसइइ दिएर फुर्सदमा रहेका युवाहरू कुलततिर फस्न सक्ने सम्भावना रहँदा यस प्रकारका प्रतियोगिताले उनीहरूको समयको सही सदुपयोग, अभिव्यक्तिमा निखारता र नेतृत्व क्षमताको विकासमा सहयोग पु¥याउने विश्वास व्यक्त गरे ।
कार्यक्रममा दन्तकाली माध्यमिक विद्यालयका बिद्यार्थीहरु, शिक्षक बालकृष्ण चौलागाईं, आइडल इङ्लिस बोर्डिङका बिद्यार्थीहरु, शिक्षक मोहन बस्नेत, स्थानीय समाजसेवी पंकज घिमिरे, वडा नं. १४ की सामाजिक परिचालक रेनुका खतिवडा लगायतको उपस्थिति रहेको थियो ।
.............
