इटहरी, मंसिर ३ गते । इटहरी नमुना कलेज इटहरीले बुधबार आफ्ना विद्यार्थीहरुलाई लागुपदार्थ दुरुपयोग सम्बन्धि अभिमुखिकरण कार्यक्रम सम्पन्न गरेको छ ।
सामाजिक अध्ययन विभागद्धारा आयोजित उक्त कार्यक्रममा आस्था फाउन्डेशन इटहरीका प्रमुख चन्द्र बराल र काउन्सिलर पर्वत राईले लागुपदार्थ दुरुपयोग सम्बन्धि प्रस्तुति दिनुभएको थियो । कार्यक्रममा कक्षा ११ का कम्प्युटर साइन्स र काुनन संकायका विद्यार्थीहरु सहभागी थिए ।
सो अवसरमा आस्था फाउन्डेशन इटहरीका प्रमुख बराल र काउन्सिलर राईले व्यक्तिहरु लागुपदार्थको कुलतमा फस्ने अवस्था, कारण र प्रभाव बारे विस्तृत जानकारी गराउनुभएको थियो ।
लागुपदार्थ दुरुपयोगको विषय महत्वपुर्ण भएकोले आगामी दिनमा अन्य संकायका विद्यार्थीहरुका लागि पनि चेतनामुलक कार्यक्रम आयोजना गरिने कलेजका प्लस टु कोअर्टिनेटर नितेश गौतमले जानकारी दिनुभयो ।
यसअघि कार्तिक २८ गते शुक्रबार साइबर अपराध सम्बन्धि चेतनामुलक अभिमुखीकरण कार्यक्रम सम्पन्न गरिएको थियो । कक्षा १२ का होटल म्यानेजमेन्ट संकायका विद्यार्थीहरुका लागि आयोजित सो कार्यक्रममा इलाका प्रहरी कार्यालय इटहरीका प्रहरी निरीक्षक तोरण परियारले साइबर अपराधका विविध विषयवस्तुमा सहजीकरण गराउनुभएको थियो ।
विद्यार्थीहरुलाई कक्षा कोठाको ज्ञान मात्र पर्याप्त नहुने भएकोले पुस्तकमा लिएको ज्ञानलाई विस्तृत रुपमा बुझेर जीवनमा लागु गराउने उद्धेश्यले कार्यक्रमहरु आयोजना गरिएको कलेज प्रमुख धर्म न्यौपानेले जानकारी दिनुभयो । विद्यार्थीहरुको सर्वाङ्गिण विकासकै लागि यस्ता कार्यक्रमहरु नियमित आयोजना गर्ने गरिएको जानकारी दिँदै उहाँले यसलाई आगामी दिनमा पनि निरन्तरता दिइने बताउनुभयो ।
....
कलेज प्रमुख धर्म न्यौपाने हुनुपर्नेमा अन्यथा भएकोले सच्याइएको छ । –सम्पादक
......
