इटहरीबाट अमर खड्काको सहयोगमा
इटहरी, पुस ३ गते । सुनसरीको इटहरीस्थित जनता बहुमुखी क्याम्पसमा यही पुस ५ गते शनिबारदेखि अन्तरराष्ट्रियस्तरको शैक्षिक सम्मेलन शुरु हुँदैछ । सम्मेलनमा विभिन्न चार देशका विज्ञसहित नेपालका चर्चित शिक्षाविद्द्वारा एक सय १२ वटा कार्यपत्र प्रस्तुत हुनेछन् ।
जनता बहुमुखी क्याम्पसलाई पूर्वकै शैक्षिक हबको रुपमा विकास गरेर लैजाने उद्देश्यका साथ सम्मेलन हुन लागेको हो । सम्मेलनको सम्पूर्ण तयारीबारे विहीबार आयोजित पत्रकार सम्मेलनमा चारवटा किनोट स्पिच, १५ वटा प्लेनरी स्पिच, चारवटा फिचर्ड स्पिच, एउटा समूह छलफल र एउटा कविता प्रस्तुती रहने सहायक क्याम्पस प्रमुख तथा सम्मेलन संयोजक इन्द्रप्रसाद प्याकुरेलले बताउनुभयो । अन्तरक्र्रियात्मक पोस्टर प्रदर्शनी, विद्यार्थी प्रतिभा जागरण सत्र, कार्यशाला र ८४ वटा कन्करेन्ट सेसन समेत सञ्चालन हुने उहाँले बताउनुभयो ।
कार्यक्रममा मुख्य नोट स्पिकरको रुपमा त्रिभुवन विश्वविद्यालय व्यवस्थापन संकायका डिन प्राडा महानन्द चालिसे, त्रिभुवन विश्वविद्यालय सिइएनएएसका कार्यकारी निर्देशक डा मिर्गेन्द्र कार्की, कोलम्बिया विश्वविद्यालय टिचर्स कलेज न्यूयोर्क अमेरिकाका डा प्रेम फियाक र बाबा मस्तनाथ विश्वविद्यालय भारतका पूर्वउपकुलपति प्रोफेसर एचएल वर्मा सहभागि हुने तय भएको छ ।
कार्यक्रममा पाँच जना विदेशी विज्ञसहित नेपालका नाम चलेका अन्य १२ जना गरि १६ जना प्लेनरी स्पिकरको रुपमा रहनेछन् जसमा दुई जनता कलेजकै प्राध्यापक रहेका छन् । चार जना फिचर्ड स्पिकर रहनेछन् । अन्तरक्र्रियात्मक पोस्टर प्रदर्शनी, विद्यार्थी प्रतिभा जागरण सत्र, कार्यशाला र कन्करेन्ट सेसन सञ्चालनका लागि पनि अलग अलग प्रस्तुती रहनेछन् ।
सम्मेलनका लागि खानपान, बसोबास, स्वागत, कार्यक्रमको तालिका, प्रचारप्रसार, आर्थिकलगायतका सवै समितिले आफ्नो तयारी पुरा गरेका छन् । शैक्षिक विज्ञ र अनुसन्धानकर्ताबिच अन्तर विषय संवाद र सहयोगलाई गति दिँदै समसामयिक विश्वका चुनौती सामाना गर्न, समय सापेक्ष शिक्षालाई परिवर्तन र परिस्कृत गरेर लैजान नवीन शैक्षिक नमूनाका लागि संरचनात्मक अध्ययन गर्नुपर्छ भन्ने सोचले कार्यक्रम गर्न लागिएको सञ्चालक समिति अध्यक्ष विकास केसीले बताउनुभयो ।
सम्मेलनका लागि ३५ लाख रुपैया खर्च अनुमान गरिएको छ । यसक्रममा सहभागीबाट रजिष्ट्रेसन शुल्क बापत प्रतिव्यक्ति दुई हजार पाँच सय लिने निर्णय भएको छ । इटहरी उपमहानगरपालिकाले सात लाख रुपैयासम्म आर्थिक सहयोग गर्ने घोषणा गरेको छ । सुनसरीमा रहेका अन्य स्थानीय तहमध्ये धेरैजसोले सहयोग गरेको जानकारी आयोजकले दिएको छ । इटहरी उपमहानगरपालिका क्षेत्रमा रहेका वडा कार्यालयमध्ये धेरैजसो वडा र अन्य दाताबाट पनि सहयोग प्राप्त भएको अध्यक्ष केसीले बताउनुभयो ।
...........
